Suche
  • lieni24

Z Nöie Aubum im Juni

Aktualisiert: Apr 2

Sit im März 2019 bini widr aktive am Musik mache.

I ha mr vorgno nach au dene Jahr ändläch mau es Projekt z mache woni vou dr hinger bi u aues drfür cha gä. Usschlaggäbend für ds ganze si viu Schicksausschleg gsy u natürlech o z Verlange nach Tegschte z schribe u mi Musikalisch usztobe.

Us Bruefleche Gründ hani mi di letschte paar Jahr chli zrügg zoge gha u ha es paar Jahr lang nume für mi säuber Musik gmacht. Afangs 2019 isch ä Autä Schueu Kolegg vo mir gstorbä. Mir hei ir Schueu Zyt guete Kontakt gha u är het o Musik gmacht gha u ab und zue sogar Tipps vo mir abghout. Sis Läbä isch vom eint ufe anger Tag wäg gsy u är het ä risigi lückä hingerla für Familie, Fründin u Fründe. Mi hets nid chönne Fassä u wöu är immr gseit het Läb dis Läbä u mach das wo dr fröid macht hani mir mau widr Zyt für mi gno u bi i z Studio gange.

U i bi mir sicher är würd säch itz fröie wener würd gseh wi viu Kraft di Wörter u Erinnerige vo früecher aubes gä hei. Dr Raffi woni sit 2009 kennä us "Face u Lieni Zytä" het mr sofort ghuufe wöu är gad ä witerbiudig zum Tontechniker gmacht u är het mr ghuufe widr chli dri z cho wöu i mini private Songs ni so ufemne Proffesioneue level uf gno ha. I dere Zyt isch dr Song "Viumeh" entstange wo im August 2019 isch usecho. I bi widr vou dinnä gsy u i has gliebt im Studio z si u nöie Tegschte z schribe. Sofort isch d Idee vo mir cho dsi gärn öpis grössers würd mache wöus nach au dene Jahr mau eifach Zyt isch u es Aubum für mi scho lang ä Troum isch hani mr dä wöue erfüüue. Dr Rähpu isch sofort drbi gsy u het mi immer widr im Hingergrund ungerstütz u mini Songs gmischt u schlussendlech oh gmasteret. I ha auso agfange im Ouguscht 2019 mit däm Aubum u es isch ä sehr spezieuä Vibe entstande wo säch chli wi Summerlech afüeut u viu mit Ufbruchstimmig z z tüe het. Es si kritischi Tegschtä wo üsi Gseuschaft u z Konsumverhaute hingerfrage drbi zeigi ni nume mitem Finger uf angeri u sägä im Song "Karma" säuber ds oh i grossi Fähler gmacht ha u wirde mache. "Es faht aues ah we du id Schueu geisch - ds Läbä im ne System wo nid ufgeit" so faht dr erscht Part vo mim Aubum ah es isch ä Song wo aues laht la ufblüehe u glichzitig o gad dr Titusong u z Intro isch. Z ganze Aubum isch ufbout u het Themenä dinä wo im Kreislouf vom Läbä vor chöme. Es si Lieder wo fröhlech si u ablänkä aber oh Lieder wo nachdänkläch si u eim hingerfrage. Z Gfüeu ds ds Aubum ferti isch hani niä gha wi bi au mine angere Projekt woni vorher gmacht ha oh u meischtens hani den immr ä rückzieher gmacht u ds ganze ni usebracht. Itz isches aber angers und oh dür di momentani Lag bini fasch z zwunge ds Aubum so usezbring wis itz isch. I hät gärn no meh Songs gmacht aber sit ds mitem Corona isch hani bim Musik mache widr ä ganz angeri Stimmig u wet mit däm ganze abschliesse u eifach numä no ds di Musig itz vilech angerne hiuft wo ir Krise si.


Z Aubum wird "Wäg" heisse u es wird ä CD Version gä mit 14 Songs u ä Digitali Version mit 10 Songs. Di Digitali Version wirds überau uf Spotify, Apple Music, usw. gä. Z Aubum wird mä aber oh per SMS chönne vorbsteue u wird när am Release Tag uf z Handy gschickt.

Da Momentan e spezieui Situation isch muessi no luege bis wenn i CDs cha bi mir ha. Sobaud i meh weiss wirdi z Realease Datum bekannt gä. Es wird wahrschinlech Afangs oder mitti Juni si wo mis Aubum usechunnt. Aui wo itz scho luscht hei dir chöits scho itz gärn bi mir vorbsteue per Insta, Facebook oder Kontaktformular hiä uf dr Website würd mi mega fröie. Dr gnau Priis chani no ni sägä aber es wird so zwüsche 10-15 Franke si.


I wirdenech hiä ufem loufende haute u oh extra no ä eigeti Site irrichte hiä uf dr Website woni aui Infos über z Aubum wirde schribe. Wi Songstracks, Cover, Back Cover usw...


I wünschenech trotz au dene Umständ ä guete Zyt u bis denn.


Lieni





#Aubummchunnt #Wäg #Lieni

49 Ansichten

©2020 Lieni