Biografie

Lieni

1994-2000

Scho us chline Giu hani zu Michael Jackson sim Thriller Song vorem Fernseh tanzet u ha d Musik gfüeut. I ha jedes Lied vom Gölä uswändig chönne u dr DJ Bobo isch dr Heud vo mire Chindheit gsy.

Weni das hiä so schribe de Schäme mi chlei für das aber genau so isches gsy.

2000-2009

I bi i d Schueu wi jedä angere oh denzumaus nid so gärn ussert es isch um Musik, Gschicht oder Kunscht gange. Oh gärn hani Ufsätz,Gedicht u Gschichte gschribe wo d Lehrer zur verzwiflig hei bracht wöu bi mir usere chline Gschicht gärn mau ä 20 Sitige Ufsatz us Huusufgabe isch wordä. I ha z obligate Flöte spile glernt,  bi irä Band gsy woni Schlagzüg spiut ha u Gsunge u ha im Orcheschter gspiut. I derä Zyt hani scho viu Hip Hop u Rap glost. Natürlech bini nid ume Eminem cho u är isch eine vo de erschte gsy woni glost ha. Im Dütschsprachige Rum ischs dr Samy Deluxe gsy woni när spöter sogar einisch Persönlech ha dörfe lehre kenne. So bini dür au di Iflüss u Konstelatione schnäu mau säuber druf cho näb dä Gedicht eigeti Songs z schribe u ufznä.

2010-2013

Im 2009 hani ungewollt mi erscht Song ufgno wöui am ne Kolegg wo ä Disstrack het wöue schribe gägäne Lehrerin ha zeigt gha winer söu Rappe. U ja dr Song isch rächt scheisse gsy  u trotzdäm heter d Rundi gmacht u für ufmerksamkeit gsorgt 

So viu Ufmerksamkeit ds mr sogar Rapper vo Flamatt gschribe hei u mi disst hei. Eine vo denä dr Räphu isch zu mine beschtä Fründe wordä u mir hei zämmä Musig gmacht ungerem Name Face u Lieni. Eine vo üsne erschte Uftritte heimer mit 16i ar Slangnacht z Züri gha. Mir si immer wi besser worde hei meh uftritte gha u hei viu Lüüt erreicht wöu mir Musik gmacht hei fürä Autag u üsi Tegschte meischtens outenthisch si gsy. Im Oktober 2010 heimer zum Samy Deluxe uf Hamburg itz Studio chönne u hei im nä Workshop sehr viu glehrt gha. Zu dere Zyt hani ono d Lehr zum Koch gmacht u diä 2013 abgschlosse. Mi Fokus isch vou uf di Lehr gsy u wäg dä Arbeitszyte isch z Projekt Face u Lieni langsam usklunge


2013-2018

I dere Zyt hani viu für mi säuber Musik gmacht u vorauem viu Tegschte  gschribe. Au di Songs heis leider niä richtig a z Tagesliecht gschafft u si i mim Chäuer im Studio ufere externe Fetsplatte. I dere Zyt hani mis Mixtape "Lienmatic" usegä woni 2015 ufgno ha u fertig ha gmacht. Usebracht hani ds ganze ersch 2017. 2015 bini mit mim beschtä Kolegg z Amerika gsy u ha z Video zum Moonliner Freestyle dräit wo äbäfaus uf däm Mixtape isch gsy.

I ha no ä witerbiudig zum Diätkoch gmacht u ha när vo 2017-2018 nümm viu Musik gmacht u mi chli zrügg zoge

JPT_4958 Kopie.jpg

2019-2020

Im Jahr 2019 isch ä Aute Schueukolegg vo mir gstorbe. Är het säuber o grappet u mir hei üs immer guet verstange. Dür dä Schicksausschlag hani gmerkt wi kurz z Läbä cha si. I bi ufgwachet u ha gmerkt ds mä im Läbä das söt mache wo eim Fröid macht u d Zyt söt gniesse. Mi söu das mache wo eim gfaut u sech nid la abezieh vo angerne. Mi söu sis Läbä läbä u nur Energie für Sache bruche wo eim guet düe u positive si. Genau diä Botschaft würd är mir itz o sägä wener nomau mit mir chönnt redä. Aber leider geit ds ni u so hani sit langem mau widr ä Song ufgno mitem Name "Viumeh" wo dr Start isch gsy für das ganze. Drbi ghuufe het mr dr Räphu är het ä Witerbiudig gmacht zum Soundtechniker u het ds ganze abgmischt. Mir hei widr meh Kontakt gha u nach paar Recording Session isch klar gsy dsi gärn wet es Solo Aubum ufnä. 2019 bini viu im Studio gsy u ha Songs ufgno ufemne angere Level aus früecher aber ds wärdet dr de sicher ono ghöre. I bi glücklech dsi immr no Musik cha mache u chanech verrate das im Summer 2020 mis erschte Solo Aubum chunnt mitem Name "Wäg".
Oh nach däm Aubum si Sache planet wo dir scho gly wärdet erfahre

©2020 Lieni